قليبك زي قطر مولود
على قضبان حزاينية
مسافر بين دموع الريد
الى بلدا خرافية
عشان بس فيها يلمح عيد
و ليهو سنين تقول مية
و لا تعب القطر وقف
و لا سفراتو مقضية
و لا الارض البفجها آه
بتبقى مسافة منهية
قليبك زي تعب رحلة
مجهجهة .. صعبة ... ابدية
مسافرين فيها ناس ياما
حياتم فيها منسية
مسافرين فيها للفرحة
من البلد الضلامية
و طول بيهم المشوار
و سال بينم اريحية
و فضفض كل زول بالفيه
و بقت آهات جماعية
و من ساعة القطر صفر
نست عجلاتو وين هي
و لا تعب القطر وقف
و لا سفراتو مقضية
و لا فرحا وصل ليهو
و لا بلدا خرافية
د.آمنة نوري